E brezhoneg n°8 : Kelc’hioù
Vendredi, octobre 26th, 2012Er gêr, diouzh ar mintin, re c’hleb an oabl evit m’am befe c’hoant mont da bourmen en ur mirdi pe ur greizenn arz a-vremañ. Labour zo d’ober met ne fell ket din kregiñ ’-barzh. Deizioù a seblant bezañ sulioù e kreiz ar sizhun. Ha ne blij ket din al labour nul. En ur c’hortoz e tapan ma dastumadeg skeudennoù.
Tamm ha tamm, e liamman etreze an traktoù a zo em daouarn hag ar skeudennoù a zo em eñvorennoù. Kelc’hioù. Kelc’hioù e pep lec’h. E-giz pa vefe gronnet Breizh hag he sevenadur gant kelchioù ha rontoù a bep seurt. Kelc’hioù kengreiz dreistholl.
Daoust-hag e c’hellfe un arouez ken simpl bezañ ken aroueziek eus hor mod da skeudennaouiñ ar bed ? Ha n’eo ket un istor kelted pe me oar gant ma kaver ar re gentañ kalz abretoc’h.
Reier kizellet kern enezenn Gavriniz, setu ar re henañ anavezet ganin, 5500 bloaz zo. War lerc’h e vo kavet ingal ar rontoù a feur ma red an amzer. Tresadennoù ha kizelladurioù ar gelted en o zouez, met ivez skeudennoù ar menec’h Iwerzhoniz. Anat eo n’eo ket bet ijinet ar c’helc’h get Breizh ha ma vez kavet anezho a hed hon istor eo peogwir e teuont gwech ha gwech eus estren vro. Koulskoude, e soñj din e teu da vezañ arouezius eus hor sevenadur en ur prantad nesoc’h. Er vroderezh e vezont kavet ivez er vro Bigouden. Ha pa ouiomp ar pouez a vez roet da zilhad ar vigouterien gant ar re n’int ket stag ouzh sevenadur Breizh, e welomp penaos e c’hell buan tapout perzhioù un arouez hollek. Met chom hep komz eus labour ar Seiz Breur a vefe eus an drochañ. Pa vez Quillivic o engravañ gwagennoù, pe c’hoazh tresadennoù Kreston awenet gant ar vroderezh, en heol kelt en o zouez. Hag hiziv an deiz ? Ya, ar c’helc’hioù kengreiz a zo paot : war sinoù ha n’int ket atav eus ar vravañ (ar skeudennoù implijet evit ar Redadeg en o zouez) ha war lizherennoù dreistholl.
Sellomp a dost ouzh un nebeud anezho. Evit bezañ un tamm resisoc’h eo ret lâret, e vo sellet spisoc’h ouzh lizherennoù bet treset evit sevel titloù, pe logotipoù. Da lâret eo ne vezont ket treset evit bezañ implijet evit un hir a destenn. E seurtoù lizherennoù eo aesoc’h reiñ muioc’h da welet, reiñ muioc’h a blaz dezho, implij stummoù a zo skoueriusoc’h eus ar spered a fell deomp lakaat war well.
Abaoe un nebeud bloavezhioù, neuze, hon eus tro da gavout kazi bep bloazh un titl pe ul logo, pe ur golo, savet gant kelc’hioù evit ur raktres liammet d’ar sevenadur breizhat. Ar re-mañ, kavet er straedoù, a zesacho buan hor selloù gant m’a diskouezont holl ul liamm sklaer ha splan gant labour ar seiz breur, ha dreistholl ar goloennoù levr savet gant Xavier Langleiz : stummoù simpl kalvezet mat, aozet ha stummet sonn ha kelc’hioù, c’hoazh hag adarre.
Setu un nebeud skouerioù da skeudennaouiñ ar pezh am eus c’Ìoant diskouez. Peadra a vefe da zielfennañ anezho spisoc’h ha pep hini d’e dro. Amañ, kouslkoude eo trawalc’h strobañ un nebeud anezho evit kompren ez eus amañ un hent da heuliañ evit sevel ur « skeudennaoueg » heverk eus un hengoun bev.
goude 2005 (n’am eus ket ar bloavezh resis) : lizherennaoueg bpzh, gant Lieux Communs evit skol an arzoù kaer Kemper.
2007 : golo nevez al levr « Seiz Breur » adembannet gant ar moulladurioù Palantines.
2008 : Brest 08, logo gant Alain Le Quernec.
2009 ha 2010 : Titl festival Kastell Paol gant Oui design.
2012 : Titl evit « Locmaria » e Kemper, graet gant Alain Le Quernec ha Carolina Rojas.
— — — — — —
En bref :
Et si finalement, le signe caractéristique qui se retrouvait dans toute l’histoire bretonne des signes c’était le rond, voir même les ronds concentriques ? Étant donné qu’on en trouve des gravures du cairn de Gavrinis (datant de 5000 ans) à certaines typographies de titrages de ces 10 dernières années, en passant par la sculpture, la broderie, et le dessin, on considère que l’hypothèse est tenable.
